स्कटल्याण्डसँगको टी–२० श्रृङखला अस्ट्रेलियाले जितेको छ। तीन खेलको श्रृङखला अस्ट्रेलियाले एक खेल अगाडी नै जितेको हो।घरेलु टोलीलाई पहिलो खेलमा ७ विकेटले हराएको अस्ट्रेलिया हिजो भएको दोस्रो खेलमा ७० रनले विजयी भयो।

अस्ट्रेलियाले दिएको एक सय ९७ रनको लक्ष्य पछ्याएको स्कटल्याण्ड १६ ओभर ४ बलमा एक सय २६ रनमा अलआउट भयो।टस हारेर पहिला ब्याटिङ गरेको अस्ट्रेलियाले निर्धारित २० ओभरमा ४ विकेट गुमाएर १ सय ९६ रन बनाएको थियो।

यो खेलमा अस्ट्रेलियाका लागि विकेटकिपर जोस इङ्ग्लिसले ४९ बलमा एक सय तीन रन जोडे।४३ बलमा शतक बनाएर उनी अस्ट्रेलियाका लागि टी–२० मा सबैभन्दा कम बलमा शतक बनाउने खेलाडी बनेका छन्।यसअघि आरोन फिन्च, ग्लेन म्याक्सवेल र इङ्ग्लिसले नै समान ४७ बलमा शतक पूरा गरेका थिए।दुई देशबीचको तेस्रो तथा अन्तिम खेल आज हुनेछ।